Bayern khelmualah beisei neiin Liverpool

“Nomawi pahnih chawi theih kan duh a, chu chu tih kan tum dawn a ni,” tiin Mohamed Salah chuan a sawi a, Premier League leh Champions League a sawina a ni.

Salah beiseina thleng dik tur chuan zaninah Liverpool-in hna hmasa an thawh a ṭul a, dar 1:30 hian Champions League last 16 second leg-ah Bayern Munich an lenchilh dawn.

Anfield-a team pahnih intawn hmasakah goal a lut lo a, hei vang hian Allianz Arena-ah mikhual team Liverpool chu dinhmun ṭha zawk anga sawi theih an ni – away goal a hlu dawn tlat!

Mahse, Liverpool boss Jurgen Klopp-a’n hna a awlsam dawn lo tih a hrechiang. German coach chuan, “Quarterfinal luh kan duh chuan game satliah khelh a thiang lo,” tiin a naute chu theihtawp chhuah turin a fuih.

Team in ang lo

Bayern Munich-in Bundesliga-a thlasik chawlh an hman zawh hnu lawk, kum tira hmahruaitu Borussia Dortmund an phak lohna chu point ruk a ni a, Dortmund hi German champion ni mai tura ngaih an ni.

Liverpool hi January thla tira Man-chester City aia an sanna chu point sarih a ni a, December-a an kaltluan dan thlir phei chuan champion mai tura ngaih an ni hman.

Mahse, March-a Bayern leh Reds inhmachhawn a hun meuh chuan German club hi Bundesliga table chung berah an awm a, Liverpool-in league-ah point khatin City an phak lo thung.

Chumiin a hrilhfiah chu tun hnaia team pahnih ‘form’ a ni a, Liverpool an hmachhawn hnua match thum an khelha goal 12 khungtu Bayern hian rin an hlawh zawk a nih pawhin a mak lo ang.

Hnehna lo chu

Liverpool manager Klopp chuan, “Kan inhmachhawn hmasak ai khan an danglam leh tawh zawk. Nuamsa takin hnehna an chang chho a, table chung berah an awm leh tawh,” tiin Bayern hneh a hautak tur thu a sawi.

Mahse, German coach hian a hriatchian sa team hi hneh theih an ni tih erawh a hai lo. Klopp chuan, “Bayern hi match hautak khelhpui thei turin kan ṭha tawk a, mahse chumi tur chuan kan ṭhat dan bera kan khelhchhuah a ngai dawn a ni.

“Team pahnih hi 0-0 chu kan dinhmun a ni a, chumiin a pholan chu hnehna kan chan ngei a ṭul tih hi a ni,” a ti a, Bayern hneh ngei a tum.

Klopp-a sawi anga Liverpool hian hnehna chan an tum a nih chuan Mohamed Salah, Roberto Firmino leh Sadio Mane te tlarhmaah an ‘form’ a ṭul dawn tihna a ni a, tlarhnungah Virgil van Dijk leh a

ṭhiante an pawimawh bawk ang.

Hriatthiam harsa

Anfield-a 0-0 a team pahnih an inhnehtawk hnu lawk khan Bayern coach Niko Kovac chuan, “Liverpool nge keini hi dinhmun ṭha zawk ka hrethiam lo,” a ti a, a hriatthiam loh chingfel turin Robert Lewandowski a mamawh ang.

Bayern hian hrem vangin Thomas Muller an la chhawr thei dawn lo a, Anfield-a dah ‘nil’ Lewy tan Allianz Arena-ah leh zel bo a fuh dawn lo – tun season-a goal 29 khung tawhtu hian a theihna tak tak a pholan a ṭul dawn.

German club tana thu lawmawm lo dang chu hrem vanga right back  Joshua Kimmich inlan thei lo tur hi a ni a, a hmun ruak luah turin Rafinha a luh a beiseiawm.

Bundesliga-a an league match hnuhnung bera Wolfsburg laka assist vawi thum neitu Franck Ribery  chu a khelh ṭhat man hmu tura beisei a ni a, Liverpool tan hnawksak siam turin a la ṭha tawk.

Reds tan rimawi

Bayern-in hrem vanga player pahnih ngawt an chhawr theih dawn loh laiin Liverpool thawm hriat erawh chanchin lawmawm lam a ni.

Burnley laka inlan lo James Milner a dam tawh a, he inkhela hliam vanga lakchhuah Trent Alexander-Arnold a dam bawk. Dejan Lovren-a’n pangngai takin training a zawm leh tawh bawk.

Reds tana thu lawmawm ber tur chu first leg-a hrem vanga inlan thei lo Virgil van Dijk-a inlan thei tawh dawn – Lewy nena an inhmachhawn tur hi hmu châk an tam ang.

Alex Oxlade-Chamberlain-a’n dam lam pan tawh mah se Bayern hmachhawn tur chuan a la rawn kir hman a rinawm lo a, Reds tan midfield-ah Georginio Wijnaldum, Jordan Henderson leh Fabinho chu inkawp tura beisei an ni.