Dan ang taka zirtirtu la turin Congress-in sorkar an phût

Congress party chuan, MNF sorkarin zirtirtu 946 lak a tumah, dan kalha thil tih a tum avangin zirtirtu lakna tura dan awm sa tidanglam turin Mizoram sorkarin Mizoram Public Service Commission (MPSC)-ah ngenna an thlen tih an tarlang a; sorkar chu dan awm sa ang taka zirtirtu la turin an phût.

Mizoram Pradesh Congress Committee (MPCC) Communi-cation department chuan, MNF sorkarin primary school leh middle school-a thawk tur zirtirtu lak a tum danah MPCC chuan thil dik lo awmin an hria tih an sawi a, “Party mi leh duhsak zawng, zirtirtu atana thiamna nei lote zirtirtua lak an nih theihna tura dan awm sa khawih danglam an tum ngei niin kan hria a, hetianga hma an la hi a demawm tak zet a ni,” an ti.

MPCC Communication department tarlan danin, zirirtu lakna dan awm sa ṭhenkhat – ‘Computer thiamna nei lak tur’ tih leh ‘Mizoram Teachers Eligibility Test (MTET) nei lak tur’ tihte chu tihdanglam leh ngaihnathiam turin Mizoram sorkarin MPSC-ah a thlen a ni.

MPSC chuan, tunlai khawvel thiamna sang zelah computer thiamna nei lo zirtirtu atana lak chu ṭha lo an tih thu a sawi a, zirtirtu training chhuak bakah MTET nei tawh awm zat Mizoram sorkar hnenah a zawt bawk.

Congress party chuan, MNF sorkarin zirtirtu 946 lak an tum dan chu zirna ngaih pawimawh lohna leh ram hmangaih lohna a nih thu tarlangin, “Thiamna sang zelah computer thiamna nei an pawimawh em em zel dawn a, kan ram leh hnam innghahna tur zirlaite thiamna leh finna an hmuh theihna tur leh Right to Education (RTE)-in a phût angin Congress sorkarin kum 2013-ah MTET exam a lo kalpui tawh a, MTET paltlang tawh mi 4,000 chuang an awm tawh a ni,” an ti.