Lianzuala’n Europe lam a hawi

Mizo tlangval Lallianzuala Chhangte chuan a vawi hnih nana trial nei turin Norwegian club Viking FK a pan a, nimin khan training a zawm nghal.

Ruahman ang chuan Lianzuala hian ni nga vel training a nei ang a, coach Bjarne Berntsen mit a tlun chuan Norwegian top division club tan hian a khel thei dawn a ni.

Lunglei tlangval chuan, “Pathian zarah beiseina ka nei sang ang reng. Theihtawp ka chhuah ang a, Mizo tihming-ṭhatu nih ka duh. In ṭawng-ṭainaah min lo hre reng rawh u,” tiin Vanglaini a hrilh a,  ṭawng-ṭaipui turin Mizo mipui a sawm.

India tan vawi kua inlana goal li khung thei Lianzuala hian season chawlh lai pawh khan training a chawlhsan lo. SYS coach R. Lalmuankima hnuaiah a bikin training a nei reng a, hmasawn a tum hle.

Lianzuala hian trial a neih zawh hnuah India camp a zawm zui dawn a, Viking FK hian contract zawrh lo pawh ni se Indian Super League club ten an dawr vek avangin khelhna tur a vai lo ang.

Lunglei FC forward hlui Lianzuala hian trial a paltlang thei a nih chuan Indian player Europe-a inkhel tawh zingah Mohammed Salim, Bhaichung Bhutia, Sunil Chhetri leh Gurpreet Singh Sandhu te hnung a zui dawn tihna a ni.

February khan Lianzuala hian Viking-ah trial a lo nei tawh a, beisei aia hmain Delhi Dynamos lamin an ko kir. Mahse, hun rei lote chhungin Viking coach mit a tlung a, trial turin an koh nawn phah.

Vanglaini

Next Post

Manchester United in Harry Maguire an lak hnuah an players hlawh hnem zual Top 10 te

Wed Aug 14 , 2019
Kan hriat angin Manchester United chuan Leicester City atangin centre-back Harry Maguire an la lut […]