Oops! It appears that you have disabled your Javascript. In order for you to see this page as it is meant to appear, we ask that you please re-enable your Javascript!

Medical college din champha lawm a ni

Zoram Medical College (ZMC) din champha (Founding Day) hmasa ber chu nimin khan Falkawna an hmunah lawm a ni a, khuallian chief minister Zoramthanga’n Para-Clinical building a hawng nghal. Chief Minister chuan, medical college ṭha leh changtlung tak ni thei turin sorkarin theihtawp a chhuah zel tur thu a sawi.

CM Zoramthanga chuan, medical college puitling siam tura hmalakna hrang hrang awm tawhte sawiin, medical college-in kum khat a tling ta chu ropui a tih thu a sawi a, “Kum khat lek chhungin zirlai leh thawktute aṭangin hmasawnna hrang hrang hmuh tur a awm a, a lawmawm hle a ni,” a ti.

Chief Minister chuan, medical college din chu thil awlái lo tak ni mah se, mipuiin an mamawh avangin tun dinhmun a thleng ta tih a sawi a, “Sum mamawh pawh tam mah se, sorkar chuan ngai pawimawhin a theih chinah a pe zel ṭhin. Medical college ṭha leh changtlung tak ni thei turin sorkarin theihtawp a chhuah zel dawn a ni,” a ti a; tunah pawh a tihchangtlunna hna thawh tur tam tak a awm thu a sawi.

Khualzahawm Dr R Lalthangliana, Health minister chuan, MBBS zirlaite chu an zirnaah theihtawp chhuah tur te, MBBS-ah duh tâwk mai lo a, zirna sang zawk beih chhunzawm zel tum turin a chah a; an zir zawh hnuah ram páwna zirna in sang leh ṭha tak taka luta thawk thei tur khawpa inzir turin a fuih.

Inkhawm hi Health secretary H Lalengmawia’n a kaihruai a, ZMC director Prof. L Fimate-in Annual Report a sawi. MBBS first year exam-a topper Lalrempuii Hmar leh subject zawng zawnga honour hmutu Vanlalchhuanpuia te hnenah lawmpuina pek a ni a; medical paper ṭhahnem tak publish tawhtu Dr C Vanlalhlua, associate professor hnenah chawimawina hlan a ni. College annual magazine PANACEA chu Chief Minister-in a tlangzarh bawk.

Chief Minister-in nimina building a hawn tâk Para-clinical building hi second year-a zir tur  department hrang hrang Community Medicine, Phar­macology, Pathology leh Microbiology-te awmna tur a ni.

ZMC hi Mizoram Institute of Medical Education and Research (MIMER) tiin din a ni a, August 7, 2018-ah khatih laia chief minister Lal Thanhawla’n a hawng. MNF party-in sorkarna an chan hnuah MIMER tih chu ZMC tiin an thlak a; Medical Council of India-ah erawh chuan MIMER tia ziah luh a la ni thung.

College-ah hian batch tinah seat 100 a awm a; second batch-a first year (2019-20) atan seat 100 awmah zirlai 70 chuangin admission an ti tawh a ni.

Huapzau

Next Post

Engvangin nge Chelsea ka chhuahsan-David Luiz

Fri Aug 9 , 2019
Kan hriat angin Chelsea Centre-Back David Luiz chuan Chelsea chhuahsanin Arsenal lamah a kal a nih kha. Deadline day a Luiz’an Chelsea a chhuahsan chhan a sawifiah. Nilaini khan David Luiz chu Chelsea training naah a tel lo a, hei […]