‘Point 98 kan la hmu thei’: De Bruyne

Premier League champion lai Manchester City chuan tun season kal mek ah EPL match 26 an khelh tawh atanga points 62 hmu tawh in an chungah Liverpool (65 points) chiah an awm.

An nomawi kawllai humhim ngei tum in tan nasa tak an la zel a, EPL mai bakah inelna dang Carabao Cup, FA Cup leh Champions League ah te an la in pet kai zel bawk a ni.

Manchester City playmaker Kevin De Bruyne chuan EPL match an khelh leh zel tura an chak vek thei anih chuan points 98 an hmu theih tur thu leh chu chu champion nana an mamawh tawk a rin thu a sawichhuak.

Nikum khan Pep-Guardiola nau te hian EPL history a a vawikhat nan points 100 an hmu tling anih kha! He an hlawhtling na kawngah hian De Bruyne chu City player thawhhlawk ber pawl a ni.

”Tuna hian dinhmun tha tak ah kan awm mek a, pakhatna dinhmun luah chu kan duh ngei mai mahse kan game hmasa lama kan chetsualna avangin kan luah thei rih lo. Kan hma hun ah erawh rilru pe taka kan khelh zel a tul tawh” tiin Man City midfielder Kevin De Bruyne an City TV a hrilh.

”EPL match khelh tur kan la nei nual a, kan chak vek thei anih chuan points 98 lai a tam kan la hmu thei, chuvangin theihtawp chhuah a kan bei tang tang a ngai. A bikin tun season hi khelhthat a har hle a, team tin te an chak in hneh an har em em a, eng game mai pawh hi fimkhur leh rilru pe taka kan khelh a tul” tiin a sawi chhunzawm bawk.