Sorkar bultumin Remna Ni lawm a ni Mizoram hi thisena lei chhuah a ngai – CM

Mizoram Remna Ni vawi 34-na chu nimin khan Mizoram sorkar (GAD) buatsaihin Vanapa Hall-ah hman a ni a, chief minister Zoramthanga khuallian a ni. Chief Minister chuan, Pathian remruat angin Mizoram chu thisena lei chhuah a ngaih thu sawiin, “Mizo nationalism chu thisena baptist a ṭul,” a ti.

June 30, 1986-a MNF leh India sorkarin inremna, Memorandum of Settlement an ziah champha, Remna Ni hi kuminah chuan Pathianni a nih avangin nimin khan a lawmna inkhawm buatsaih a ni. Inkhawmah hian chief secretary mawhphurhna la mektu Lalhmingthanga chu chairman a ni a; sorkar hnathawk under secretary leh joint director chin chunglamte leh pawl hrang hrang hruaitute an tel.

Zoramthanga chuan, “Pathian remruat angin Zoram hi thisena lei chhuah a ngai a, nationalism hi thisena baptist a ṭul a ni,” a ti a; chutiang tur chuan Pathianin Assam chief minister Chaliha chu mak tak maiin a ti â tlat nia sawiin, “Chaliha khan Pu Denga kha a be duh lo a, sipai a rawn tír chho a. Kha kha politics-a thutlukna a siamah a tih fuh loh ber a ni ang, a inchhir ve ṭhinin ka ring,” a ti.

June 30, 1986-a inremna ziah zan chu Mizoram mipui zawng zawng hlim tlan ber hun a nih thu sawiin Zoramthanga chuan, “Remna kha kan lawm tlaivar

ṭhak mai a, pawl leh party bik a awm lo,” a ti. Hun a kal hret a, politics vangtein Remna Ni hlutna a tlahniam hret tih a sawi rualin, “Tunah erawh chuan a ropuizia kan hre thar leh a, kan lawm leh ta mup mup mai a ni,” a ti a; kuminah pawh Remna Ni chu ropui taka lawm a nih thu a sawi.

Zoramthanga chuan, Mizoram movement kal chho chu a inhne fuh hle tih sawiin, remna atana inbiakna kal chhoh dante a sawi a, “Remna hi kei leh nangin kan tih theih a ni lo, chung lam hnathawh, a remruatna a ni. He ram hi malsawmna Pathianin a pekna turin kan hun kal tawh zawng zawng kha Pathian remruat a ni a, a rei tial tial a, a mak kan ti tulh tulh. He ram hi Pathianin min la hmang dawn chauh a ni,” a ti.

Chief Minister chuan, party te, pawlte leh kohhrante’n ni pawimawh hrang hrang an nei angin, Mizoram sorkar pawhin ni pawimawh bik pahnih a nei tih sawiin, “Pakhat chu kan pian ní, State Day a ni a, a dang leh chu Remna Ni a ni. India sorkarpawhin Independence Day leh Republic Day a ngai pawimawh a, chumi ang chuan Remna Ni leh State Day hi a pawimawh,” a ti a; lawm mup mup an phû thu a sawi.

CM Zoramthanga chuan, Mizoram buai laiin Mizoram mipui, kohhran leh party zawng zawngin remna an duh tih sawiin, “Remna tur atan Pathianin thil tê tak tê tê thlengin rem min ruatsak a… India ram mipui zawng zawng, MNF mi zawng zawng leh Mizoram mipui zawng zawng aiawhin mi pathumin remna an ziak a, sawi buai theih a ni lo. Pathian remruat a ni,” a ti. Peace Accord chu páwng bawhchhiat theih emaw, duh duha tihdanglam theih emaw a ni lo tih a sawi bawk.

Inkhawmah hian Central YMA president Vanlalruata pawhin thu sawiin, Mizoram, India rama state ralmuang ber a ni chu lawmawm a tih thu a sawi a, “Remna vawn nun hi kan mawhphurhna theuh a ni tih hria ila; mipui, kohhran, sorkar leh NGO tinte i tangrual zel ang u,” a ti.

MKHC aiawha thu sawitu Rev. Lianhmingthanga Sailo, Synod Sr. Executive Secretary chuan, inrem hi Pathian duh zawng a nih avangin kohhrante’n remna a awm theih nan hma a la ṭhin tih sawiin, “Mizorama inremna turah pawh kohhrante’n theihtawp chhuahin hma a la a, pawl leh mimal hrang hrangte pawhin hma an la a. Pathian duh dan angin inremna a lo awm ta; he inremna hi a hlu em em a, a ropui tak zet a ni,” a ti a; Mizoramah remna leh muanna a awm zel theih nana ngaihtuahna seng zel turin Mizoram mipui a sáwm.

Remna Ni lawmnaah hian Memorandum of Settlement-a Mizoram sorkar aiawha hming ziaktu, inremna ziah laia Mizoram chief secretary Lalkhama hnenah chawimawina hlan a ni.

Huapzau

Next Post

July thla Ballon d'Or Power Ranking

Wed Jul 3 , 2019
Tun kum meuh zawng Ballon d’Or dawng tur hriat a harsa hle mai, Lionel Messi leh Cristiano Ronaldo erawh chu rinkai an ni em em tawh lo a, season hmasa lam pawh khan he award hi an dawng tawh lo […]

ads