United vs Barca hi Messi leh Pogba inbeihna a ni ang!- Zlatan Ibrahimovic

UEFA Champions League quarter-final Manchester United leh Barcelona khel turah Zlatan Ibrahimovic chuan Lionel Messi leh Paul Pogba te inbeihna a ni ang tiin a sawi.

Ole Gunnar Solskjaer tan chuan a managerial career-ah inelna lian ber a ni dawn a, game 6 chhung hneh theih loh Spain club lian Barcelona chu zanin zing lam dar 12 ah an hmachhawn dawn a ni.

Sweden tana goal khung tam ber Zlatan Ibrahimovic chuan he inkhel hi a hmun ngeiah a en dawn niin an tarlang.

Zlatan Ibrahimovic hi Barcelona leh Manchester United tana lo khel tawh players 8 zinga pakhat a ni.

“Game en chakawm ber a nih ka ring” tiin Ibrahimovic chuan United official website-ah a sawi.

“Teams lian ve ve, club lian ve ve te an khel dawn a ni. History ropui tak an nei ve ve, team pahnih te hian players tha tak tak an nei ve ve, vawiin ni hian tu nge chak zawk kan en ang”

“Lionel Messi hi game tinah a danglam thin, chutiang bawkin United lam atang pawhin Paul Pogba hi a danglam ve thin”

“Pogba leh Messi te inbeihna a nih ka ring, he game hi teams ah a innghat dawn a, player pakhat chauh ni lovin.  Mahse, Pogba leh Messi te hian game an thlak dawn a ni.”

“Barca ka hriat reng dan chu, khawvel team tha ber an ni tih hi a ni” tiin Zlatan chuan a sawi.